Zesumme fir d’Kierch vu muer
Déi éischt Missioun vun der Kierch ass et, d’Evangelium ze verkënnegen, aus him eraus ze liewen an an der Welt ze wierken – mat eiser Pastoral, an eiser Liturgie, duerch eis Diakonie. Dofir brauch et nieft dem grousse benevolen Asaz vu ganz ville Leit an eiser Äerzdiözees, Fraen a Männer, déi sech ganz an den Déngscht vun dëser Aufgab stellen.
Fir dës engagéiert Fraen a Männer an hirer wichteger Missioun z’ënnerstëtzen, huet d’Fondatioun Sainte-Irmine den Zukunftsfong vun der Kierch, de Fonds d’avenir, gegrënnt. Zil vun dësem Fong ass et, zur materieller Ofsécherung vun den Haaptamtlechen, Geeschtlech a Laien, bäizedroen. Zanter dem Akraafttriede vun den neie Relatiounen tëscht Staat a Kierch 2016 huet de Bistum ronn 40 Leit, virun allem Priister, op seng eege Käschten agestallt.
Zanter senger Schafung virun 10 Joer konnt de Fonds d’avenir e Kapital vu méi wéi 3,6 Milliounen Euro opbauen. 2024 huet d’Stëftung ugefaangen, via d’Recettë vun de Placementer éischt Paie vu jonke Priister a Laien am kierchlechen Déngscht ze iwwerhuelen. Och wann de Fonds d’avenir elo aktiv gëtt, bleift d’Initialkapital konservéiert, sou datt all Don e konkreeten Investissement an d’Zukunft vun eiser gemeinsamer kierchlecher Missioun ass.
Am Mäerz 2025 konnt d’Fondatioun Sainte-Irmine 133.811 Euro un de Bistum weiderleeden, fir esou zur Finanzéierung vun de Paie vu jonke Geeschtlechen a Laien am kierchlechen Déngscht bäizedroen.
Ënnerstëtzt dofir och Dir den Zukunftsfong vun der Kierch mat engem Don, engem Ordre permanent, enger Donatioun, bei engem Familljenevenement oder duerch eng testamentaresch Dispositioun an hëlleft esou, d’Astellung vu Geeschtlechen an haaptamtleche Laien matzedroen.
D’Kierch vu muer brauch eis all!
DON MAM VERMIERK: ZUKUNFTSFONG
CCPLLULL LU79 1111 7038 7846 0000
D’Donen un d’Fondation Sainte-Irmine si vun der Akommessteier ofsetzbar no de gesetzleche Bestëmmungen.
Mat mengem Klick akzeptéieren ech d’Notzung vun deene Cookien, déi fir d’Bezuelen onbedéngt noutwenneg sinn. Méi doriwwer wëssen
“Hëlleft eis, den Ënnerhalt vum Klerus a vun de Laien am Déngscht vun der Kierch z’assuréieren.”
