Karibuni

Karibuni – Wëllkomm – d’Integratiounsaarbecht mat jonke Flüchtlinge vum JRS-LU ënnerdeelt sech an zwee Projeten:

Projet fir schoulesch Inklusioun: Karibuni – Hal Dech un!

De Projet Karibuni – Hal Dech un! wëll jonke Flüchtlingen tëscht 13 a 25 Joer vun allen Originnen, ideologeschen Iwwerzeegungen a Sproochekenntnisser hëllefen, andeem en, zesumme mat Partner, e Raum fir ze léieren an sech auszetauschen bidd; esou kann hiren Integratiounsprozess an hir Selbstbestëmmung gefërdert ginn a si gi motivéiert, un hire perséinleche Projeten ze schaffen.

De Projet gëtt geleet vun enger Ekipp, déi sech zesummesetzt aus enger professionneller Vollzäitmataarbechterin, Benevolen an europäesche Volontairen; de Projet gëtt alle jonke Flüchtlingen, déi a Foyeren oder a Famillje liewen, proposéiert, mat engem Fokus op déi, déi am schwaachste sinn, an déi, déi Problemer op hirem schoulesche Parcours hunn.

De Projet bitt eng Ënnerstëtzung, vereinfacht den Zougank zu Informatiounen, gëtt Rotschléi a proposéiert, en individuelle Plang fir all Jonken auszeschaffen. Formatiounen am Grupp ginn ugebueden, fir esou de Jonken eng sozial Erfarung z’erméiglechen, éier si e Stage fir eng Orientatioun oder eng Léier ufänken.

De Projet Karibuni – hal Dech un! huet dës Ziler:

– de jonke Flüchtlingen hëllefen, sech am Schoulsystem z’integréieren an hire Bildungswee ze packen;
– eng personaliséiert Begleedung unzebidden, fir esou de Besoinen, den Talenter an den Interesse vun de Jonke gerecht ze ginn;
– eng no Begleedung, fir Absencen, Retarden, Ängschten a Gefiller et net ze packen virzebauen an eng adaptéiert Äntwert ze ginn, fir esou ze verhënneren, datt si an der Schoul net nokommen;
– perséinlech Formatiounen a Weiderbildung am Grupp unzebidden, déi hirt Selbstvertrauen stärken, fir d’Gestioun vu Konflikter an d’Preventioun vu Gewalt;
– Jonker ze motivéieren, u Fräizäitaktivitéiten deelzehuelen, déi de JRS wärend der Fräizäit an am Summer organiséiert;
– enk mat edukativen Ekippen, Lycéeën, Benevolen, Volontairen a professionelle Mataarbechter, déi di Jonk ënnerstëtzen, zesummeschaffen.

De Projet bitt deene jonke Flüchtlingen och eng Begleedung bei der aktiver Sich no Stagen, no enger Léier oder engem Vakanzenjob, andeem datt Firmae sensibiliséiert ginn, hinne Méiglechkeeten ze bidden, fir si esou séier wéi méiglech an de schoulesche System oder an d’Beruffswelt zu Lëtzebuerg z’integréieren.

E preventive Projet fir mental Gesondheet: Motirõ (zesummen)

Dëse Projet proposéiert eng ganzheetlech Ënnerstëtzung fir déi jonk Flüchtlingen, déi an de Foyere fir Flüchtlingen hei zu Lëtzebuerg oder a Famillje wunnen, déi eventuell mat verschiddene Verloschter ze kämpfen hunn: Verloscht u Selbstvertrauen, u Vertrauen an anerer, an d’Zukunft oder an de Sënn vum Liewen.

Duerch d’Organisatioun vun Aktivitéiten am kulturellen, sportlechen a Fräizäitberäich gëtt e gemeinschaftlechen Usaz encouragéiert; donieft gëtt och eng Formatioun zesumme mam SNJ ugebueden, fir déi jonk Leader ze valoriséieren, dëst an enker Zesummenaarbecht mat multidisziplinären Ekippen an de Wunnfoyeren, fir esou jonk Flüchtlingen tëscht 15 a 25 Joer z’ënnerstëtzen.

Aktivitéiten, déi ugebuede ginn:

Kulturell Atelieren: Gesank, Danz, Schreiwen, Theater, Zeechnen, Molen, Sproochegruppe mat Iwwersetzer, Partizipatioun un de wichtegen Deeg vun all Kultur. Den interkulturellen Austausch gëtt encouragéiert, ouni de Glawen oder déi reliéis Iwwerzeegunge vun deem aneren a Fro ze stellen.

Wanderungen an der Natur: fir déi physesch a psychesch Gesondheet, fir den Ofbau vu Stress a vun Depressiounen, fir d’Bewosstsäin vun der Bedeitung vum Ëmweltschutz.

Sportaktivitéiten: positiven Impakt op d’Gesondheet vun de jonke Flüchtlingen, Verbesserung vun der séilescher Belaaschtbarkeet, vun der Autonomie a vum Vertrauen, an engem Mix vu Kulturen a Reliounen. Zu de sportlechen Aktivitéiten zielen nieft dem Futtball, den Hiphop, de Volleyball, de Velo, d’Sprangen am Seel.

Geschichtlech Visitten: d’Geschicht vum Land verstoen an alles, wat dozou beigedroen huet, datt et haut esou ass, wéi et ass.

Aner Aktivitéiten: Gesellschaftsspiller, Dëschtennis, Dëschfussball, Bowling, Schlittschong, Kino, Partizipatioun u Festivaler an un Aktivitéite vun aneren Associatiounen.

Individuell Aktivitéiten: Schwammen a Velo fuere léiere mat Volontairen.

Bei all Aktivitéit ass et wichteg, datt de Grupp heterogen bleift, fir datt et keng Ënnergruppe gëtt, a jiddereen oppasst, wat den anere mécht, ouni driwwer z’uerteelen. D’Iddi dohannert ass, datt jonk Afghanen, Eritreeër, Syrer, Kongolesen, Iraner, Ukrainer, an anerer, sech ënnert sech a mat Jonker vun hei begéinen an engem oppenen a beräichernde Geescht; dofir gi si encouragéiert, flott Momenter zesummen ze verbréngen an esou en ze grousse Konsum vun den Handyen ze vermeiden.

Am Projet sinn och Formatioune fir déi Benevol an déi europäesch Fräiwëlleg virgesinn, fir si virzebereeden op de viséierte Public, op de Schoulsystem, d’Stagen an d’Beruffer, op d’Aarbecht mat de jonke Flüchtlingen, a besonnesch op d’Aart a Weis, wéi ee mat Jonken an eise Partner kommunizéiert. D’Ënnerstëtzung duerch d’Donateuren, d’Zesummenaarbecht mat de Partner, d’Presenz an d’Aarbecht vun de Volontairen a vun de benevole Mataarbechter hëlleft, d’Integratioun un déi nächst Generatiounen virunzeginn.

Am Projet sinn doriwwer eraus och Partenariater virgesi mat Servicer fir Studenten, mat der Aarbechtswelt, privaten Entreprisen an der Gesellschaft am Allgemengen, fir esou déi jonk Flüchtlingen ze begleeden an där Gesellschaft, déi si ophëlt, an iwwer déi Wäerter nozedenken, déi si dréit.

MENTIOUN VUM DON: KARIBUNI

CCPLLULL LU64 1111 7017 0305 0000 BILLLULL LU42 0027 5100 4006 0800
BCEELULL LU53 0019 4055 0036 1000

All Donen un d’Fondation Sainte-Irmine si vun der Akommessteier ofsetzbar no de gesetzleche Bestëmmungen.