Zesumme fir d’Kierch vu muer
Déi éischt Missioun vun der Kierch ass et, d’Evangelium ze verkënnegen, aus him eraus ze liewen an an der Welt ze wierken – mat eiser Pastoral, an eiser Liturgie, duerch eis Diakonie. Dofir brauch et nieft dem grousse benevolen Asaz vu ganz ville Leit an eiser Äerzdiözees, Fraen a Männer, déi sech ganz an den Déngscht vun dëser Aufgab stellen.
Fir dës engagéiert Fraen a Männer an hirer wichteger Missioun z’ënnerstëtzen, huet d’Fondatioun Sainte-Irmine den Zukunftsfong vun der Kierch, de Fonds d’avenir, gegrënnt. Zil vun dësem Fong ass et, zur materieller Ofsécherung vun den Haaptamtlechen, Geeschtlech a Laien, bäizedroen. Zanter dem Akraafttriede vun den neie Relatiounen tëscht Staat a Kierch 2016 huet de Bistum ronn 40 Leit, virun allem Priister, op seng eege Käschten agestallt.
Nodeems an de leschte Jore mat Hëllef vu ganz generéisen Donatricen an Donateuren e Basiskapital vu méi wéi 3 Milliounen Euro opgebaut konnt ginn, iwwerhëlt d’Stëftung vun 2024 un via d’Recettë vun de Placementer éischt Paie vu jonke Priister a Laien am kierchlechen Déngscht. Och wann de Fonds d’avenir elo aktiv gëtt, bleift d’Initialkapital konservéiert, sou datt all Don e konkreeten Investissement an d’Zukunft vun eiser gemeinsamer kierchlecher Missioun ass.
D’Zil vum Verwaltungsrot ass et parallel, d’Kapital vum Fonds d’avenir an den nächste Jore weider opzebauen. Esou soll op laang Siicht d’Pastoral vun der Kierch verstäerkt matfinanzéiert kënne ginn.
Ënnerstëtzt dofir och Dir den Zukunftsfong vun der Kierch mat engem Don, engem Ordre permanent, enger Donatioun, bei engem Familljenevenement oder duerch eng testamentaresch Dispositioun an hëlleft esou, d’Astellung vu Geeschtlechen an haaptamtleche Laien matzedroen.
D’Kierch vu muer brauch eis all!
DON MAM VERMIERK: ZUKUNFTSFONG
CCPLLULL LU79 1111 7038 7846 0000
D’Donen un d’Fondation Sainte-Irmine si vun der Akommessteier ofsetzbar no de gesetzleche Bestëmmungen.
Mat mengem Klick akzeptéieren ech d’Notzung vun deene Cookien, déi fir d’Bezuelen onbedéngt noutwenneg sinn. Méi doriwwer wëssen
“Hëlleft eis, den Ënnerhalt vum Klerus a vun de Laien am Déngscht vun der Kierch z’assuréieren.”
