NEIE PROJET: WELTJUGENDDEEG 2027

Virun de Weltjugenddeeg (Vir-JMJ): Japan entdecken a kulturell a spirituell andauchen

De 25. Juli 2027 mécht sech e Grupp vun 80 jonke Leit a Begleedpersounen aus der Äerzdiözees op de Wee a Japan fir déi éischt Etapp vun hirer Pilgerrees op d’Weltjugenddeeg. Dës Virbereedungsphas wäert fir déi Jonk eng eenzegaarteg Erfarung sinn – op kulturellem, mënschlechem a spirituellem Plang.

Als eng Zort zweet Heemecht vun eisem Här Äerzbëschof, dem Kardinol Jean-Claude Hollerich, bitt Japan de Participanten d’Méiglechkeet, eng Gesellschaft mat enger räicher Geschicht, mat Traditiounen a Géigesätz kennenzeléieren. Begleet vum Kardinol Hollerich, en Expert vum Land, an deem hien e groussen Deel vu sengem priisterlechen Déngscht verbruecht huet, kënnen déi Jonk d’Realitéite vun der lokaler Kierch entdecken, verstoen, wéi Chrëschten hei liewen a wéi si an engem Kontext vun enger minoritärer Kierch Zeie vun hirem Glawen sinn, an an Dialog mat chrëschtleche japanesche Gemeinschaften trieden.

Dës Etapp vum Programm bitt och d’Méiglechkeet, hiert Wësse vun der Geschicht vum Land ze verdéiwen, besonnesch déi tragesch Evenementer vum Zweete Weltkrich; d’kollektiivt Gediechtnes an d’Kultur vu Japan sinn ëmmer nach vun de Konsequenzen heivunner marquéiert. Duerch Visitten, Begéinungen an Zäite fir Reflexioun ginn d’Participanten encouragéiert, en oppene Bléck op d’Welt ze entwéckelen, gepräägt vun de Wäerter vu Fridden, Versönung a Bridderlechkeet.

D’Weltjugenddeeg 2027 zu Seoul (Südkorea)

Déi zweet Etapp vun der Pilgerrees féiert d’Participanten op Seoul a Südkorea, wou si mat honnertdausende jonke Leit aus alle fënnef Kontinenter zesummekommen, fir d’Weltjugenddeeg ze feieren.

Vum 2. bis den 10. August 2027 huelen déi Jonk um offizielle Programm vun de Weltjugenddeeg deel: liturgesch Feieren, Katecheesen, Zäite vu Gebiet, kulturell Festivitéiten, international Treffen a grouss Begéinunge mam Poopst. Dës Deeg bidden eng eenzegaarteg Geleeënheet, d’Universalitéit vun der Kierch an hirer ganzer Diversitéit onmëttelbar ze erliewen.

Op dëser Etapp vun der Rees wäert en zweete Grupp vun ongeféier 20 Participanten derbäi kommen, sou datt d’Zuel vun der lëtzebuerger Delegatioun op ongeféier honnert Jonker a Begleeder klëmmt. Zesumme wäerte si eng Erfarung vu Glawen, Bridderlechkeet a Missioun maachen, déi hinnen hëlleft, hiert Engagement an hiren jeeweilege Gemeinschaften no hirem Retour ze stäerken.

Ziler vum Projet

Iwwer d’Rees eraus, bidd dës Wallfaart de jonke Leit eng prägend Erfarung, déi hinnen hëlleft, mënschlech a spirituell ze wuessen a sech kierchlech ze engagéieren. Wärend der Rees hu si d’Geleeënheet:

• nei Kulturen, Traditiounen a sozial Realitéiten ze entdecken, an dobäi eng Oppenheet fir d’Welt ze entwéckelen;
• chrëschtlech Gemeinschaften an Asien ze begéinen a verschidden Zougäng, fir de chrëschtleche Glawen ze liewen an auszedrécken, besser ze verstoen;
• den Alldag, d’Gebiet an d’Gemeinschaft mat den anere Membere vum Grupp an de Leit, déi si op der Rees begéinen, ze deelen;
• en authenteschen Austausch mat jonke Leit vu verschiddene Nationalitéiten, Kulturen a kierchlechen Traditiounen ze erliewen;
• hir Bezéiung zu Christus duerch Massen, Gebietszäiten a spirituell Begéinungen ze verdéiwen;
• iwwer hiren eegene Liewenswee am Liicht vun den Erfarungen, déi si erliewen, den Zeien, déi si héieren, an den Entdeckungen, déi si maachen, nozedenken;
• hire Sënn fir Verantwortung, Solidaritéit an Engagement, fir aneren ze déngen, ze entwéckelen;
• no hirem Retour, Zeien an Akteure vun der Kierch a vun hire Poren, Mouvementer a Gemeinschaften ze ginn.

Virbereedung op d’Rees

D’Virbereedung ass en integralen Deel vum Projet an e wichtegen Aspekt vun der Erfarung vun de Weltjugenddeeg. Laang virum Depart ginn d’Participanten invitéiert, u verschiddenen Etappen deelzehuelen, déi hëllefen, sech géigesäiteg besser kennenzeléieren, en enke Grupp ze bilden an sech op déi spirituell, kulturell a praktesch Dimensioune vun der Pilgerrees virzebereeden.

Treffen a Formatioune ginn organiséiert, fir d’Theemen am Zesummenhang mat de Weltjugenddeeg ze entdecken, de chrëschtleche Glawen vun de Participanten ze verdéiwen an déi kulturell Realitéite vu Japan a Südkorea kennenzeléieren. Doriwwer eraus wäerten Zäite fir Mass ze feieren, fir nozedenken an zesummen ze deelen den Zesummenhalt vum Grupp an e Geescht vun der Komerodschaft fërderen.

Donieft wäerten déi Jonk sech aktiv abrénge bei der Organisatioun vum Projet duerch verschidde Fundraising-Initiativen. Zil vun dësen Initiativen ass et net nëmmen ze hëllefen d’Rees ze finanzéieren, mee och dat perséinlecht Engagement, d’kollektiv Verantwortung an d’Solidaritéit ënner de Participanten ze entwéckelen.

Op dës Mannéier wäerten d’Weltjugenddeeg sech net nëmmen op eng Rees vun e puer Woche limitéieren, mee si ginn zu engem Parcours vu mënschlecher, spiritueller a missionarescher Formatioun, déi zesummen am Geescht vum Evangelium a vun der universeller Bridderlechkeet gelieft gëtt.