Thailand 2025

An der Suite vun dräi Reesen (2014, 2017, 2019) vun engem Grupp Jonker a Begleeder vu Lëtzebuerg an Thailand an no der Invitatioun vu jonke Karen, fir un de Weltjugenddeeg zu Krakau an zu Lissabon deelzehuelen, gräift den Äerzbëschof vu Lëtzebuerg d’Initiativ nees op, fir no der Ënnerbriechung duerch d’Covid-Pandemie erëm an Thailand ze reesen. Dofir mécht sech am August 2025 nees e Grupp vun 30 Jonker a Begleeder op Pilgerrees a Richtung Thailand.

Op der éischter Etapp gesinn déi Jonk hir Alterskolleege vum “Xavier Learning Center” zu Chiang Rai am Norde vun Thailand erëm. Wärend e puer Deeg fënnt en interkulturellen Austausch mat de Studente vum “Xavier Learning Center”, virun allem Karen, statt. Wärend de leschte Reesen haten déi Jonk un engem Bauprojet vun deem Zentrum deel geholl. D’Karen sinn eng thibetesch-birmanesch Ethnie vu 4 bis 5 Millioune Leit, vun deenen ongeféier 10 Prozent an Thailand an 90 Prozent am Myanmar liewen. D’Karen, am Norde vun Thailand an der Provënz Tak ugesidelt, wunnen an Dierfer an de Bierger. E groussen Deel vun den Karen an Thailand (140.000) lieft allerdéngs a Flüchtlingscampen laangscht d’Grenz mam Myanmar.

Déi Jonk maachen hei d’Erfarung vun engem Liewen an engem vill méi einfachen an aarmen Ëmfeld wéi zu Lëtzebuerg. Si begéine ganz einfach Fraen a Männer, déi e liewege Glawen hunn, a si ginn esou invitéiert a Relatioun mat Gott ze trieden.

Déi Jonk:

entdecken eng nei Kultur, déi verschidden a ganz villfälteg ass;
deelen den Alldag an de Glawe vun de Karen, déi verschidde Konfessiounen hunn;
erliewen en intensiven Austausch mat de jonke Karen am Kader vun engem interkulturellen Austauschprogramm;
kënnen eng Relecture vum perséinleche Liewe maache mat Bléck op déi erlieften Erfarungen.

Aner Etappe vun der Rees sinn d’Visitt vu Chiang Mai mat sengem räiche kulturelle Patrimoine a vun Ayutthaya, déi al Haaptstad vum Räich Siam.

Fir dës Rees virzebereeden, si verschidden Aktivitéite geplangt, déi feste Bestanddeel vum Projet sinn.
Sou huelen déi Jonk u Virbereedungsdeeg deel wéi och un der Preparatioun an Ausféierung vu Fundraising-Aktivitéiten.

MENTIOUN VUM DON : THAILAND 2025

CCPLLULL LU64 1111 7017 0305 0000 BILLLULL LU42 0027 5100 4006 0800
BCEELULL LU53 0019 4055 0036 1000

D’Donen un d’Fondation Sainte-Irmine si vun der Akommessteier ofsetzbar no de gesetzleche Bestëmmungen.