Blog

Fir eng Ierfschaft fir d’Fondation Sainte-Irmine ze maachen, musst Dir en Testament zu hire Gonschte verfaassen. Fir datt en Testament liicht accessibel ass nom Doud, kënnt Dir et engem Notaire uvertrauen oder eng Kopie Ärem/Ären Ierwe ginn.

Et gëtt tëscht dräi Typpe vun Testamenter ënnerscheet:

„Testament olographe”

Et gëtt vun Iech verfaasst. Et muss handschrëftlech, datéiert a vun Iech ënnerschriwwe sinn.

Et gëtt keng aner Konditioun, fir datt e gülteg ass, mee et ass wichteg, datt Äre Wëlle kloer, genee an ouni Ambiguitéiten ausgedréckt ass.

„Testament authentique ou public”

Dir diktéiert Äre Wëllen Ärem Notaire a Presenz vun zwee Zeien oder engem zweete Notaire. D’Testament gëtt dono vum Notaire verfaasst. No der Redaktioun vum Testament gëtt den Notaire Iech et fir nozeliesen, a Presenz vun den Zeien. No der Lektür gëtt d’Testament vun Iech selwer, wéi och vum Notaire an den zwee Zeien respektiv vun den zwee Notairen ënnerschriwwen.

„Testament mystique”

Dir schreift a signéiert Äert Testament a presentéiert et dono, zou a versigelt, engem Notaire. Dësen, a Presenz vun zwee Zeien, setzt en „Acte de souscription” op. Wann Dir dëse Wee wielt, gëtt Äre leschte Wëlle geheim gehalen bis zu Ärem Doud. Dir kënnt Äert Testament och vun enger drëtter Persoun opsetze loossen, ënnert der Konditioun, datt Dir et selwer ënnerschreift.

„LEGS PARTICULIER”

Dir kënnt e bestëmmten Deel verierwen (eng Wunneng, eng Geldzomm, Wäertpabeieren, e wäertvolle Géigestand, asw.).

„LEGS UNIVERSEL”

Dir kënnt Äre ganze Besëtz verierwen. D’Integralitéit vun Ärem Patrimoine geet un dee vun Iech designéierten Ierwen, virausgesat Dir hutt keng Ierwen, deenen e Flichtdeel zousteet.*

„LEGS À TITRE UNIVERSEL”

Dir wëllt e Véirel, en Drëttel oder d’Hallschent vun Ärer Ierfschaft oder eng Kategorie vun Äre Gidder (all „Biens mobiliers”, all „Biens immobiliers”) vermaachen.

*Wann dat de Fall ass („Nokommen” oder e „Partner”), si si vum Gesetz aus geschützt, andeem’s datt een Deel vun der Ierfschaft, genannt „Réserve” fir si blockéiert ass. Deen Deel, deen iwwreg bleift, gëtt „Quotité disponible” genannt. Dësen Deel kënnt Dir der Fondation Sainte-Irmine vermaachen.

Dir wéilt gären, och no Ärem Doud, en Zeeche vu Generositéit géintiwwer Mënschen an Nout setzen an der kathoulescher Kierch hëllefen hir Missioun z’erfëllen, fir all deenen, déi Ënnerstëtzung an e Message vu chrëschtlecher Hoffnung brauchen, bäizestoen?

Da maacht eng Ierfschaft!

Wat ass eng Ierfschaft?

Eng Ierfschaft ass eng testamentaresch Verfügung mat där ee wielt, fir, den Ament vu sengem Doud, en Deel oder säi ganze Besëtz enger oder méi ausgewielte Persounen oder Organisatiounen ze vermaachen.

Andeems, datt Dir der Fondation Sainte-Irmine en Deel oder Äert ganzt Iewen iwwerschreift, vermaacht Dir Äre Patrimoine engem Zweck, deen Iech um Häerz leit. Soulaang Dir lieft, behaalt Dir Äre Besëtz, wat bedeit, datt Dir doriwwer fräi verfüge kënnt, mee Dir hutt d’Gewëssheet, datt e spéiderhin der Fondatioun erlaabt, konkret Mënschen an Nout bäizestoen.

Gitt Ärem Patrimoine, wéi och ëmmer en ass, méi Sënn.

Är Ierfschaft kann all Zorte vu Besëtz ëmfaassen: eng Zomm Suen, Bijouen, eng Wunneng, Konschtwierker asw. Et geet duer, et an Ärem Testament z’ernimmen.

Är Ënnerstëtzung ass nëtzlech an effikass, och wa se nëmme bescheiden ass. Als unerkannte Fondatioun déngen déi Gidder, déi hir iwwerschriwwe ginn, integral hirer Missioun.

D’Fondation Sainte-Irmine ass ermächtegt, fir Ierfschaften, Donatiounen a Liewensversécherungen unzehuelen.

D’Ierfschaft erlaabt et, Projete vun der Kierch z’ënnerstëtzen, déi keng staatlech Subventioune kréien.

Eng Ierfschaft oder eng Donatioun un d’Kierch ass eng Akt, dee Sënn mécht, e Message vun Ärer Säit, aus dem Glawen eraus, en Ausdrock vun Ären déiwen Iwwerzeegungen, jo, vun Ärem Choix an Äre Prioritéiten iwwer den Doud eraus.

Maacht eng Donatioun elo – virun Ärem Doud

Eng Schenkung maachen heescht fir eng Persoun (den Donateur) zu Liefzäiten an op eng irreversibel Manéier, d’Rechter un oder de Besëtz vun engem Gutt un eng aner Persoun (den Donataire) z’iwwerschreiwen.

Nom Gesetz muss eng Donatioun duerch en „Acte authentique” virun engem Notaire gemaach ginn. D’Schenkung däerf net den Undeel, deen zur Verfügung steet („Quotité disponible”), depasséieren, wann Dir Flichtierwen hutt. Am anere Fall gëtt se entspriechend reduzéiert.

Wat kënnt Dir schenken?

All Besëtz ka Géigestand vun enger Donatioun sinn: Geld, e „Bien mobilier ou immobilier”, Wäertpabeieren,…

Et kann een tëscht zwee Typpe vun Donatiounen ënnerscheeden:

• „Donation de la pleine propriété”:

Dir decidéiert, Äre Besëtz exklusiv an absolut weiderzeginn.

• „Donation de la nu-propriété”:

Dir iwwergitt Äre Besëtz, mee Dir behaalt d’Notzerrecht (usufruit), sief et fir Iech selwer, sief et fir eng drëtt Persoun, déi Dir bestëmmt hutt. Dës Formule ass besonnesch praktesch fir Gebaier: Dir kënnt, zum Beispill, Äert Haus schenken a weiderhi wärend Ärem ganze Liewen dra wunnen (Widdem), wéi e Besëtzer.

Wéi mécht een eng Schenkung?

Wann Dir Iech decidéiert hutt, eis eng Donatioun ze maachen, huelt Kontakt mat eis op.