De 24. November hunn déi kontemplativ Schwëstere vum spirituellen Zenter um Cents hier Dieren ausnamsweis opgemaach. Dëst war eng gutt Geleeënheet, fir hir 10 Joer Presenz hei zu Lëtzebuerg ze feieren an de Leit en Abléck an hiert Liewen am Alldag an engem Klouschter an der Stad ze ginn.
Fir méi Detailer iwwer dësen Dag, klickt hei!
Wann Dir de spirituellen Zenter um Cents ënnerstëtze wëllt, klickt hei.
Copyright : Isabelle Scart – SCP
Nodeems de Poopst Franziskus wärend senger apostolescher Visitt hei zu Lëtzebuerg de 26. September de Marie-Jubiläum offiziell opgemaach huet, fänken d’Aktivitéite ronderëm 400 Joer Wallfaart bei d’Tréischterin elo am Dezember un. E Sonndeg, den 8. Dezember, ass um 10.30 Auer eng Pontifikalmass an der Kathedral zum Ufank vum Muttergottesjubiläum mat uschléissender Prëssioun bis bei d’Glacis-Kapell, wou d’Statu vun der Tréischterin wärend enger Woch bleift.
Bis Schlussoktavsonndeg, de 25. Mee 2025, fannen dann eng Rei reliéis Feieren, Konferenzen, Concerten, Ausstellungen an aner Aktivitéite fir Kleng a Grouss statt. D’Geschicht vun der Oktav gëtt am neie Buch “Klagt in Leid … 400 Jahre Wallfahrt zu U. L. Frau von Luxemburg, Trösterin der Betrübten” vum Professer Georges Hellinghausen retracéiert.
All Informatiounen zum Marie-Jubiläum fannt Dir hei: https://www.cathol.lu/www/oktav/400-joer-wallfaart-bei-dtreischterin
Wann Dir dëse schéine Projet, dee vun der Fondatioun Sainte-Irmine matgedroe gëtt, ënnerstëtze wëllt, da klickt hei.
Reegelméisseg ënnerstëtzt d’Fondatioun d’Seminaristen, déi hei zu Lëtzebuerg studéieren, sief et am Grand séminaire de Luxembourg oder am Séminaire Redemptoris Mater. Wéi déi Semestere virdrunn och, huet d’Stëftung nees d’Käschte fir déi extern Professeren am Kader vun der “Formation canonique en philosophie et théologie” iwwerholl. Dank der Hëllef vun enger Rei Donatricen an Donateure konnt FSI Rechnunge am Gesamtwäert vu 17.352,66.- Euro fir d’Summersemester 2024 bezuelen. Merci am Numm vun de Seminariste fir Är Generositéit!
Wann Dir d’Ausbildung vun den zukünftege Priister fir d’Lëtzebuerger Kierch weider matdroe wëllt, da klickt hei. Merci villmools fir all Gest!
Fir an den Advent ze starten, gi mir Iech Rendez-vous dëse Freideg vu 7 Auer bis e Samschdeg 7 Auer fir d’24 Stonne fir eiser Här.
D’weltwäit Gebietsnetz vum Poopst ass vun 20 bis 21 Auer un der Rei, d’Seminariste iwwerhuelen d’Stonn vun 22 bis 23 Auer.
De Weibëschof Mgr Leo Wagener hält zum Ofschloss vun der Adoratioun e Samschdeg Moien um 7 Auer d’Mass.
Kommt, sou wéi et Iech geet, vir enger Véirelstonn, eng Stonn oder fir d’Nuecht laangscht a maacht Ärt Häerz op fir d’Begéinung mam Jesus.
Léif Donatricen, léif Donateuren,
Dank Ären Done konnt d’Fondatioun Sainte-Irmine 179.430 Euro fir de Kaddo vum Poopst sammelen.
Dëse Kaddo gouf him de 26. September bei Geleeënheet vun der Begéinung mat der kathoulescher Gemeinschaft an der Kathedral zu Gonschte vu senger “Aumônerie apostolique” offréiert.
De Poopst Franziskus huet awer spontan bestëmmt, datt dës Zomm genotzt sollt ginn, fir Mënschen an Nout hei zu Lëtzebuerg ze ënnerstëtzen. Esou huet de Poopst dëse Kaddo dem Äerzbistum zréck geschenkt. An den nächste Méint decidéiert de Verwaltungsrot vun der Fondatioun, presidéiert vum Kardinol Jean-Claude Hollerich, wéi de betraffene Leit zu Lëtzebuerg am beschte gehollef ka ginn. Precisiounen heizou ginn dee Moment matgedeelt.
Villmools Merci fir Är Generositéit a Merci dem Poopst fir säin aussergewéinleche Gest!
Crédit photo : SCP
D’Tëleesmass gëtt dëse Sonndeg, 15. September, fir d’éischte Kéier iwwerhaapt aus der renovéierter Kapell vum Glacis iwwerdroen. De Generalvikar Patrick Muller, Rekter vun der Glaciskapell, steet der Feier vir. D’Mass gëtt gehale fir all lieweg a verstuerwen Donatricen an Donateure vun der Fondatioun Sainte-Irmine, a besonnesch vun de Projeten “Tëleesmass”, “Renovéierung vun der Glaciskapell” a “Formatioun vun den zukünftege Priister”. Musikalesch gëtt d’Mass animéiert vu Seminaristen, déi zesumme mam Vollek sangen.
Fir matzefeiere fannt Dir d’Liddertexter op engem Lidderblat op dëse Link.
Zanter November 2023 gouf d’Glaciskapell renovéiert. Déi lescht Méint war d’Kapell fir déi grouss Aarbechten zou; heidrënner gesidd Dir e puer rezent Fotoe vum Chantier. D’Freed ass elo grouss: vun dësem Mëttwoch, 14. August, un ass se nees op fir de Public. D’Mass um Virowend vu Mariä Himmelfaart gëtt um 18.15 Auer gefeiert. Sidd häerzlech wëllkomm! Dir kënnt dëse Projet weiderhi mat engem Don ënnerstëtzen!
De Projet “Bibelen am Prisong”, dee vun der Prisongsaumônerie duerchgefouert gëtt, huet et erlaabt, 50 franséisch Bibelen, 50 englesch Bibelen, 25 portugisesch Bibelen, 25 däitsch Bibelen a 5 italieenesch Bibelen ze kafen. 
Kalennere (310 Stéck) konnten och verdeelt ginn.
Dës Kalenneren an d’Bibelen ginn de Leit, déi an de Prisongen um Uerschterhaff/Suessem an zu Schraasseg sëtzen (an engem méi klenge Mooss och zu Givenech), offréiert.
Dëse Projet ass eng wichteg Hëllef fir d’Prisonéier, fir datt si och am Prisong am Kontakt mam Wuert vun eiser Här sinn, fir verschidde Gefaangener fir d’éischte Kéier an hirem Liewen.
Merci fir Är Donen!
Fir de Projet “Bibelen am Prisong” ze ënnerstëtzen, klickt hei!
De Projet Saxum Lëtzebuerg huet am éischte Semester 2024:
– 15 Recollectio,
– 36 Reunioune fir Studium a Formatioun,
– 3 Seancen iwwer de Katechismus vun der kathoulescher Kierch a
– 5 Liesungen vum Buch “Dieu est parmi nous ” vum Abbé Salvador Canals organiséiert.
Fir de Projet Saxum Lëtzebzerg ze ënnerstëtzen, klickt hei!
