Blog

Bei Geleeënheet vum Besuch vum Poopst Franziskus de 26. September 2024 zu Lëtzebuerg hat d’Fondatioun Sainte-Irmine Sue gesammelt fir de Kaddo fir de Poopst, dee geduecht war fir d’apostolesch Aumônerie (Dicastère fir den Déngscht vun der Baarmhäerzegkeet). Op Demande vum Poopst hi blouf déi gesammelt Zomm zu Lëtzebuerg “fir déi Aarm” a gouf u sozial Wierker am Grand-Duché weidergeleet.

Bei Geleeënheet vun enger Visitt am Siège vun der Associatioun de 15. Abrëll 2026 gouf offiziell e Scheck vun 20.000 Euro un d’Stëmm vun der Strooss iwwerreecht, dëst a Presenz vun der Madamm Alexandra Oxacelay, Direktesch vun der Stëmm, an der Ekipp vun der Fondatioun Sainte-Irmine.

Dir kënnt hei den Artikel iwwer d’Verdeele vun de Fonge vum Kaddo vum Poopst noliesen.

De Wonsch vum Poopst gouf heimadder erfëllt. Merci fir Är Donen, a mir hoffen och an Zukunft op Är Generositéit zielen ze kënnen.

Wann Dir méi iwwer d’Aarbecht vun der Stëmm vun der Strooss gewuer wëllt ginn, da klickt hei.

Fir eis lafend Bankkäschten ze reduzéieren an d’Gestioun vun eise Konten ze optimiséieren, gouf am Verwaltungsrot vun der Fondatioun am Mäerz 2026 decidéiert, zwee Comptes-courants, déi d’Fondatioun bei Banken huet, an den nächste Méint zouzemaachen.

Vun dëser Mesure sinn dës Konte betraff:
CCP LU79 1111 7038 7846 0000
BGL LU81 0030 8856 3963 0000.

Mir giffen Iech heimadder frëndlech bieden, vun elo un ee vun dësen dräi anere Konte vun der Fondatioun Sainte-Irmine ze notzen respektiv Ären Ordre permanent entspriechend ëmzeänneren:

Post Luxembourg
Code BIC: CCPLLULL – IBAN: LU64 1111 7017 0305 0000
Banque et Caisse d’Épargne de l’État (Spuerkeess)
Banque et Caisse d’Épargne de l’État (Spuerkeess)
Code BIC : BCEELULL – IBAN : LU53 0019 4055 0036 1000
Banque internationale à Luxembourg
Code BIC : BILLLULL – IBAN : LU42 0027 5100 4006 0800

Mir soen Iech am Viraus villmools Merci fir Äert Versteesdemech a profitéiere vun der Geleeënheet, Iech och en häerzleche Merci fir Är Generositéit, Är Ënnerstëtzung an Är Trei ze soen.

Léif Visiteuren,

D’Ekipp vun der Fondatioun huet de Joresrapport 2025 gemaach, fir datt Dir all wichteg Informatiounen zur Stëftung an hiren Aktivitéiten a Projeten fannt, déi mat der Hëllef vun Ären Done konnte finanzéiert ginn.

Mir soen Iech e grousse Merci fir Är lescht Donen an hoffen, och 2026 op Ären Appui zielen ze kënnen!

Wëll de Poopst Franziskus wärend der Begéinung an der Kathedral spontan säi Wonsch zum Ausdrock bruecht hat, datt d’Sue vu sengem “Kaddo” zu Lëtzebuerg bleiwe sollten an hei genotzt géifen zu Gonschte vu benodeelegte Leit a vun de Flüchtlingen, gouf aus dem “Kaddo fir de Poopst” mat Ärer Hëllef e “Kaddo vum Poopst”!

Nodeems Ufank 2025 eng éischt Tranche vun 100.000 Euro u fënnef Associatioune gaange war, ass elo de Rescht vun der Aktioun un dës sozial Wierker iwwerwise ginn:

– Stëmm vun der Strooss asbl: 20.000.- Euro fir hir Aarbecht zu Gonschte vun den Obdachlosen;

– Vie Naissante asbl: 20.000.- Euro fir schwanger Fraen a jonk Mammen an Nout materiell ze ënnerstëtzen;

– Jesuit Refugee Service Lëtzebuerg asbl: 15.000.- Euro fir hir Flüchtlingsaarbecht;

– Premier secours de l’Ordre de Malte Luxembourg asbl: 15.000.- Euro fir hir Aarbecht zu Gonschte vu Leit um Bord vun der Gesellschaft;

– Projet “Diakonie” am Dekanat Süden-West: 13.922,40.- Euro fir den diakoneschen Engagement am Dekanat.

Am November 2025 hat d’Fondatioun doriwwer eraus mat den Done vum Kaddo vum Poopst d’Pilgerrees “Fratello” op Roum fir 40 Leit a prekäre Liewenssituatioune mat hire Begleeder finanzéiert.

Villmools Merci allen Donatricen an Donateuren, déi op dësem Wee dozou bäigedroen hunn, Mënschen a schwierege Liewenssituatiounen ze hëllefen a si esou ze stäerken!

De Verwaltungsrot huet en Deel vun de fräien Donen aus dem Joer 2025 u verschidde Projete verdeelt

A senger Sëtzung vum 13. Mäerz 2026 huet de Verwaltungsrot vun der Fondatioun Sainte-Irmine decidéiert, e Gesamtmontant vu 25.000 Euro, deen aus Donen ouni spezifesch Mentioun besteet, déi wärend dem Joer 2025 gemaach goufen, un dës Projeten ze verdeelen:

– Projet “Kambodscha/Vietnam 2026” (Pilgerrees vun der Jugendpastoral): 10.000.- Euro;

– Fonds d’avenir vun der Äerzdiözees: 7.500.- Euro;

– Projet “Formatioun vun den zukünftege Priister”: 7.500.- Euro.

Ufank Dezember 2025 hat de Verwaltungsrot schonn decidéiert, déi nei Gemeinschaft Obra de Maria mat 40.000.- Euro un Dons libres vum Exercice 2025 ze ënnerstëtzen.

D’Fondatioun seet allen Donatricen an Donateure villmools Merci fir hir wäertvoll Ënnerstëtzung!

Am Kader vum Projet “Valorisatioun vun der Kathedral” huet d’Kierchefabrick vun Notre-Dame decidéiert, eng weider Tapisserie ze restauréieren. De Wandteppech mam Titel “La révélation de Dieu à Gédéon”, deen op der lénker Säit am ale Chouer hänkt, gëtt vun der Manufacture royale De Wit vu Mechelen, déi och schonn zwee aner Wandteppecher vun der Kathedral a Stand gesat hat, restauréiert. De Käschtepunkt beleeft sech op 18.356 Euro.

Ënnerstëtzt och Dir de Projet vun der Valorisatioun vun der Kathedral mat Ärem Don. Merci fir all Geste!

Fir de Projet ze ënnerstëtzen, klickt hei!