Aktivitéitsrapport 2023
Zesumme fir d’Kierch vu muer
Als éischt, villmools Merci!
Mat grousser Dankbarkeet fir Är immens Ënnerstëtzung an Är Trei stelle mir Iech den Aktivitéitsrapport vun der Fondatioun Sainte-Irmine fir d’Joer 2023 vir. D’Resultat vum Exercice war nëmme méiglech, wëll Dir, léif Donatricen an Donateuren, op en Neits ganz generéis waart. Och dëst Joer waart Dir nees zu ganz vill, fir d’Stëftung an duerch si déi 24 Projeten, déi si an de Beräicher vun der Pastoral, der Diakonie, der Formatioun an dem Patrimoine promovéiert, ze ënnerstëtzen. Merci och am Numm vun de Kierchefabricken an de Poren fir all wichtege Geste zu Gonschte vum Kierchefong.
An dësem Rapport presentéiere mir Iech kuerz d’Kärzuele vum Exercice 2023, déi nei Projeten, déi am Laf vum Joer lancéiert goufen, déi schéin Entwécklung vum Fonds d’avenir an och eis Aktivitéiten. Mir profitéiere vun der Geleeënheet, fir alle Responsabele vun de Projeten an all deenen, déi eng Hand mat ugepaakt hunn, en häerzleche Merci ze soe fir hir Aarbecht, déi eis et erméiglecht huet, zesummen eis Ziler ze erreechen. Mir sinn hinnen dofir ganz dankbar!
Léif Donatricen an Donateuren, zanter elo elef Joer steet d’Fondatioun Sainte-Irmine, déi vun eisem Här Äerzbëschof, dem Mgr Jean-Claude Kardinol Hollerich, initiéiert gouf, am Déngscht vun der Pastoral vun eiser Äerzdiözees. Loosse mir zesumme weider fueren, wëll d’Kierch vun haut a vu muer brauch eis all!
Nach eng Kéier: Villmools Merci!
D’Ekipp vun der Fondatioun Sainte-Irmine
D’Joer an Zuelen
D’Zomm vun den Donen, déi mir 2023 kruten: 989.424,67 Euro
D’Zuel vun de Projeten, déi 2023 ënnerstëtzt goufen: 24
D’Zuel vun den Donen: 5.514
D’Zuel vun den Donatricen an Donateuren: 2.827
Den Total, dee fir de Fonds d’avenir erakomm ass: 276.236,09 Euro
Réckbléck op déi 10 Joer an déi aner Aktivitéiten 2023
a) Tëleesmass am Mäerz
Am Kader vum 10. Gebuertsdag vun der Fondatioun gouf den 19. Mäerz 2023 d’Tëleesmass aus der neier Kapell vum Foyer Saint Jean-Paul II um Belval iwwerdroen. De Weibëschof Leo Wagener huet d’Mass presidéiert, de Chanoine Georges Hellinghausen (Projet Tëleesmass) an de Père Pablo Rombolà (Projet vum spirituellen Zenter vum Cents) hu concelebréiert, assistéiert vum Diakon Michele Camposeo. D’Mass gouf gefeiert fir all lieweg a verstuerwen Donateure vun der Fondatioun Sainte-Irmine.
D’Bridder vun der Fraternité Verbum Spei (Fr. Alban, Fr. Augustin, Fr. Raphaël), déi sech ëm d’Héichschoulpastoral um Campus Belval këmmeren, an d’Membere vun der Famill Camposeo (den Diakon Michele, d’Emanuela, d’Rosamaria an de Gabriele) hunn d’Mass musikalesch animéiert. D’Isabella an de Michele Camposeo sinn d’Coordinateure vum weltwäite Gebietsnetz vum Poopst hei zu Lëtzebuerg.
Eng Partie Projeten, déi vun der Stëftung ënnerstëtzt goufen, ware fir dës Mass versammelt: Verbum Spei, Tëleesmass, MISSIO Lëtzebuerg, de spirituellen Zenter vum Cents, d’weltwäit Gebietsnetz vum Poopst, d’JMJ 2023, d’Formatioun vun de künftege Priister a Reech eng Hand. Et war eng ganz schéi Mass, déi Kraaft geschenkt huet; eng Rëtsch Donateure vun der Tëleesmass hu positiv reagéiert.
b) Neien Depliant
2023 gouf och en neien zweesproochegen Depliant (lëtzebuergesch-franséisch) realiséiert, dee sech vum Design hier un der Broschür vum 10. Anniversaire orientéiert huet. All Projeten, déi zu deem Ament ënnerstëtzt goufen, ginn hei mat enger Foto an engem kuerzen Text virgestallt. Dësen Depliant, deen zanter November 2023 verdeelt gëtt, ass op einfach Ufro hi bei der Fondatioun ze kréien.
c) Campagnen a Bréiwer
Am Juni huet d’Fondatioun eng Postkaart gemaach, fir d’Communicatioun vun de Bridder vu Verbum Spei ze vereinfachen. Dës Kaart, déi gutt bei de Leit ukomm ass, gouf ënnert anerem genotzt fir d’Chrëschtwënsch vun der Gemeinschaft.
Vu Juni bis September huet d’Fondatioun op hirem Site an op der Facebook-Säit vum Äerzbistum eng Serie vu Video vun de Projetsresponsabele gewisen, déi der Fondatioun all Gudds fir hire Gebuertsdag gewënscht hunn. Am ganze goufe 7 Videoen diffuséiert. Et war eng ganz flott Aktioun, fir d’Gesiichter vun eise Projetspartner mat den 10 Joer vun der Fondatioun ze verbannen.
Am Hierscht hunn de Chanoine Patrick Muller, President vum Lëtzebuerger Priisterseminaire, an den David David Rodriguez, Rekter vum Seminaire Redemptoris Mater, beid verantwortlech fir de Projet “Formatioun vun de künftege Priister” e Bréif un d’Donateure geriicht, an deem si iwwer d’Aktualitéite vum Projet informéiert an ëm weider Ënnerstëtzung gefrot hunn.
Am Dezember, an nodeems den neie Logo vum Fonds d’avenir fäerdeg war, gouf e Bréif, fir Fongen ze sammelen, un all Donateure vum Zukunftsfong geriicht.
d) D’Ekipp erneiert sech
Am September 2023 konnt d’Ekipp eng nei Mataarbechterin begréissen, d’Ivana Katusic. D’Ivana huet eng Plaz am Sekretariat vun der Bistumsverwaltung an hëlleft och als administrativ Assistentin an der Fondatioun mat.
Fokus op de Fonds d’avenir
A senger Sëtzung vum 14. November 2023 huet de Verwaltungsrot vun der Fondatioun zwou wichteg Entscheedungen zum Fonds d’avenir geholl. Vun dësem Joer un ginn all Zënsen an aner Erträg vun de Finanzplacementer vun der Stëftung automatesch un de Fonds d’avenir affektéiert. An, vun 2024 un, gëtt de Gesamtmontant vun dëse Recetten all Joer un de Bistum iwwerwisen, fir esou zur Finanzéierung vun der Pastoral vun der Kierch beizedroen, an hei besonnesch fir d’Käschten an Zesummenhang mat de jonke Priister a Laien a kierchlecher Missioun matzedroen, déi vum Bistum agestallt goufen. Op dës Mannéier dréit den Zukunftsfong knapp zeng Joer no senger Schafung éischt Friichten.
Zanter senger Grënnung 2014 an dank der Generositéit vun den Donatricen an Donateure konnt de Fonds d’avenir bis elo e Kapital vu méi wéi 3 Milliounen Euro zesummendroen. Mat den Zënse vun de Placementer vum Zukunftsfong fänkt d’Fondatioun elo un éischt Paien ze iwwerhuelen. Dës Approche erlaabt et dem Fonds d’avenir, d’Basiskapital ze erhalen respektiv weider ze vergréisseren, a gläichzäiteg säin Zil schonn ze erfëllen. Dofir ass all Don eng konkreet Investitioun an d’Zukunft vun eiser gemeinsamer kierchlecher Missioun.
Am Virfeld vun dësen Entscheedunge vum Verwaltungsrot hat d’Ekipp vun der Fondatioun hir Kommunikatioun zum Fonds d’avenir verstäerkt. Fir dem Fong méi eng grouss Visibilitéit ze ginn, gouf e Logo mam Slogan “Zesumme fir d’Kierch vu muer” entworf, op Lëtzebuergesch an op Franséisch. Donieft gouf d’Säit vum Fong um Site irmine.lu iwwerschafft an am neien Depliant gouf de Fong op enger ganzer Säit virgestallt. Schliislech gouf virun der Feierdeeg um Enn vum Joer e Bréif un all Donateure vum Fonds d’avenir adresséiert, fir si iwwer déi rezent Entwécklungen an d’Bild ze setzen. D’Promotioun vum Fonds d’avenir bleift eng Prioritéit vun der Ekipp vun der Stëftung an den nächste Joren.
Déi 4 nei Projeten, déi 2023 lancéiert goufen
Wärend dem Joer 2023 huet d’Fondatioun 4 nei Projeten ugeholl an de Beräich vun der Pastoral, vun der Formatioun a vum Patrimoine:
Bibelen am Prisong
Op Ufro vun der kathoulescher Prisongsaumônerie gouf de Projet “Bibelen am Prisong” am Juni 2023 lancéiert. Zil vun dësem Projet ass et, Bibelen an enger doze Sproochen an de Kalenner “Paroles d’espérance”, dee vun der Ekipp vun der Aumônerie verdeelt gëtt, ze finanzéieren. D’Bibel (an enger kompletter Versioun) an an der eegener Sprooch kënnen ze liesen ass wichteg fir déi Prisonnéier, déi no Glawen a Spiritualitéit sichen. Vun Ufank un hat dëse Projet Succès bei den Donateuren, an de Montant vu 5.000 Euro (pro Joer) konnt an nëmmen e puer Méint gesammelt ginn.
Renovatioun vun der Glacis-Kapell
Enn Oktober 2023 hunn d’Renovatiounsaarbechten an der Glacis-Kapell, déi 1885 gebaut gouf, ugefaangen. Am Kader vun dësen Aarbechten ginn déi al Wandmolereien zum Deel restauréiert (dorënner d’Mauer mam Grafstee vum Mgr Nicolas Adames, éischte Bëschof vu Lëtzebuerg, an d’Béi vum Ducksal vun der Kapell); déi aner Deeler vum Gebai ginn nei ugestrach an d’Beliichtung gëtt erneiert. Dës Renovatioun schreift sech an an de Kader vum 400. Anniversaire vun der Oktav 2024-2025. Zil ass et, bis Enn 2024 200.000 Euro u Spenden ze sammelen. An nëmmen e puer Woche si scho 15.000 Euro dank Ärer Generositéit erakomm.
Valorisatioun vun der Kathedral
Nom Projet vun der Restauréierung vun der symphonescher Uergel vun der Kathedral, déi am November 2022 ofgeschloss konnt ginn, huet d’Kierchefabrick vun der Kathedral am Dezember 2023 eng nei Initiativ bei der Fondatioun Sainte-Irmine agereecht: d’Valorisatioun vun der Kathedral, mam Zil de Patrimoine vum Kierchegebai ze erhalen an den Accueil fir déi Gleeweg an déi vill Visiteuren ze entwéckelen. An deem Kader goufen zwee éischt Projeten der Generositéit vun de Gleewegen uvertraut: d’Restauratioun vun zwee groussen Teppecher, déi den hl. Ignatius vu Loyola an den hl. Franz-Xaver duerstellen, an d’Valorisatioun vun der Fënster (Rosette) um Niveau vum Ducksall duerch eng entspriechend Beliichtung. Fir dës Projete kënnen ze realiséieren, gëtt eng Zomm vun 20.000 Euro gebraucht.
Saxum Lëtzebuerg
Pétrusse asbl, eng Initiativ fir Volléksbildung, déi an de Beräicher vun der Formatioun, vun der Kultur a vun der Erzéiung aktiv ass, huet Enn 2023 e chrëschtleche Bildungsprojet gestart mam Numm “Saxum Lëtzebuerg”. Saxum Lëtzebuerg wëll all Mount Recollectiounen a verschiddene Sproochen fir 25 bis 40 Leit wéi och wëchentlech Versammlunge fir chrëschtlech Formatioun hei zu Lëtzebuerg ubidden. Fir dës Recollectiounen, déi fir de Public op sinn, gëtt op qualifizéiert Personal an entspriechend Raim zréckgegraff. De Käschtepunkt pro Joer beleeft sech op 10.000 Euro.
JMJ 2023: de Projet ass ofgeschloss
Op Invitatioun vum Mgr Jean-Claude Kardinol Hollerich hat d’Jugendpastoral 180 Jonker aus Lëtzebuerg, aus Thailand, aus dem Vietnam, aus Japan an aus Australien invitéiert, mat op d’Weltjugenddeeg ze goen, déi am Summer 2023 zu Lissabon waren, fir zesummen eng déif Glawenserfarung ze maachen. No dräi Deeg hei an der Diözees, hunn déi Jonk un der Pilgerrees mat Statiounen zu Lourdes, Loyola, Braga a Lissabon deel geholl. Dank Ären Done konnt d’Fondatioun Sainte-Irmine dëse schéine pastorale Projet mat 11.702 Euro ënnerstëtzen.
Donen, déi 2023 erakomm an an d’Projeten investéiert goufen
Am Laf vum Exercice 2023 huet d’Fondatioun Donen an Héicht vun 989.424,67.- Euro krut; eng Zomm déi däitlech ënnert dem Resultat vum virleschte Joer leit, dëst virun allem wëll keng gréisser Successioune gemaach goufen. D’Projeten, déi am meeschten ënnerstëtzt goufen, sinn de Fonds d’avenir, de Kierchefong an d’Tëleesmass. Déi 2 Grafiken heidrënner ginn op ee Bléck eng Iwwersiicht, wivill pro Projet erakomm ass an op wivill de Gesamtbetrag pro Projetskategorie sech beleeft.
Fir méi iwwer eis Projeten an d’Aktivitéite vun der Fondatioun an hire Partner gewuer ze ginn, kuckt op https://irmine.lu
De Finanzrapport vun der Fondatioun Sainte-Irmine fir d’Joer 2023 an déi auditéiert Konte sinn disponibel am Juni 2024.
Dir hutt eng Fro oder eng Ufro? Dann zéckt net, Kontakt mat eis opzehuelen: info@irmine.lu, Tel. 462023.