Aktivitéitsrapport 2024
Är Done fir de Fonds d’avenir brénge Friichten!
De Verwaltungsrot an d’Ekipp vun der Fondatioun soen Iech Merci fir dat gutt Joer 2024 a freeë sech 2025 zesumme mat Iech virunzefueren! Hei en Iwwerbléck iwwer d’Aktivitéiten an d’Resultat vun der Fondatioun am Joer 2024.
1. D’Joer an Zuelen
Gesamtzomm, déi 2024 erakomm ass: 1.464.882.- Euro
Projeten, déi 2024 ënnerstëtzt goufen: 29
Zuel vun Donen: 6.022
Zuel vun Donateuren/Donatricen: 3.097
Zomm, déi fir de Fonds d’avenir erakomm ass: 296.263.- Euro
1. Al an nei Projeten
Am Februar 2024 huet d’Fondatioun Sainte-Irmine en Spendenappell lancéiert, fir eng pakistanesch Famill ze ënnerstëtzen, déi wéinst hirem Glawen aus hirem Land huet misse flüchten. Eisen Äerzbëschof huet zesumme mat der Ekipp vu Reech eng Hand dofir gesuergt, datt dës kathoulesch Famill, déi e Jong huet, zu Lëtzebuerg nei ufänke kann.
Am Laf vum Summer konnt de Projet vun der Renovéierung vun der Glacis-Kapell ofgeschloss ginn. No gréissere Renovatiounsaarbechten huet d’Kapell de 14. August 2024 nees hir Diren opgemaach a presentéiert sech haut méi schéi wéi jee.
Am Kader vun der Initiativ “Valorisatioun vun der Kathedral” konnt 2024 dank enger Rëtsch generéisen Donateuren en éischte Projet realiséiert ginn: d’Restauratioun vun zwou groussen Tapisserien aus dem 17. Jorhonnert, déi den hl. Ignatius an den hl. Franz Xaver duerstellen.
En 2024 koum de Projet Karibuni u säin Enn. Fir 2025 iwwerhëlt d’Fondatioun en neie Projet vum JRS (Jesuit Refugee Service): Ubuntu rebondit a Sproochecoursen. Am Mëttelpunkt vun dësem Projet, dee sech u jonk erwuesse Flüchtlingen an deplacéiert Persounen adresséiert, stinn d’Begéinung an den Accueil wéi och Visitten an de “Centres de rétention”. De Projet proposéiert doniewent solidaresch Sproochecoursen op Franséisch, fir d’Integratioun vun de jonken Erwuessenen ze vereinfachen.
Am Dezember 2024 huet d’Fondatioun en neie Projet an der Jugendpastoral lancéiert: Thailand 2025 proposéiert eng Pilgerrees an Thailand fir Jonker zesumme mat eisem Äerzbëschof am August 2025; wärend der Rees begéine si dem Vollek vun de Karen.
1. Wichteg Momenter fir d’Fondatioun
– En Empfang fir d’Donateuren an der Maison Iñigo
De 15. Mee 2024 huet d’Maison Iñigo en Empfang fir d’Donateure vun der Fondatioun Sainte-Irmine organiséiert. Dëst war eng gutt Geleeënheet, fir den Donateure Merci ze soen an d’Aarbechten an der Maison Iñigo mat hiren Auswierkungen op déi vill Aktivitéiten, déi hei organiséiert ginn, virzestellen. D’Fondatioun huet en Deel vun de Käschten iwwerholl an un dësem schéinen Evenement deel geholl.
– D’Tëleesmass 
De 15. September 2024 huet d’Fondatioun Sainte-Irmine eng Tëleesmass organiséiert, déi aus der Glacis-Kapell iwwerdroe gouf. Nodeems d’Aarbechten am Summer 2024 ofgeschloss goufen, war dëst eng gutt Geleeënheet fir de Public vun der Tëleesmass, fir d’Resultat vun der Renovatioun vun der Kapell ze gesinn. D’Mass gouf presidéiert vum Chanoine Patrick Muller, Generalvikar a Rekter vun der Kapell, an aminéiert vun de Seminaristen zu Lëtzebuerg. Dëst war e Moment vu Gebiet a vu Merci fir all Donateure vun der Stëftung. Am Virfeld vun der Tëleesmass war e Bréif un déi 1.202 Donateure vum Projet Tëleesmass gaangen.
– D’Visitt vum Poopst Franziskus
De 26. September 2024 ass de Poopst fir een Dag op Visitt op Lëtzebuerg komm. Bei dëser Geleeënheet war d’Fondatioun Sainte-Irmine beoptraacht ginn, fir Donen ze sammelen, fir esou dem Poopst e Kaddo z’offréieren, zu gonschte vum Dicastère vum Service vun der Baarmhäerzegkeet (apostolesch Aumônerie) am Vatikan. Mat grousser Freed konnt den Äerzbëschof 179.930 Euro un de Poopst iwwerreechen; dësen huet awer spontan säi Wonsch zum Ausdrock bruecht, datt d’Suen zu Lëtzebuerg bleiwe sollten an hei genotzt gi fir aarm a benodeelegt Leit a fir Flüchtlingen. Eng éischt Tranche vun 100.000 Euro gouf Ufank 2025 u fënnef karitativ Organisatioune verdeelt.
4. Besonnesch Ënnerstëtzung fir d’Fondatioun
Zu deene ville klenge Gesten, déi dacks net opfalen, gehéiert d’Ënnerstëtzung duerch d’Kanner vun der éischter Kommioun vu Bartreng-Stroossen, déi hir Famillje gefrot haten, fir en Don un d’Fondatioun ze maachen, fir esou d’Lokalsektioun Bartreng-Stroossen vu Reech eng Hand ze ënnerstëtzen. D’Fondatioun seet hinnen en häerzleche Merci!
Merci soe mir och de Kanner vun der éischter Kommioun vu Leideleng, déi hir Famillje invitéiert haten, en Don un d’Fondatioun ze maache zu Gonschte vu MISSIO Lëtzebuerg.
D’Fondatioun ass och alle Famillje vu léiwe Verstuerwenen dankbar, déi bei dëser Geleeënheet Projeten ënnerstëtzen. Dat ass eng grouss Hëllef!
5. De Fonds d’avenir
Zanter senger Schafung virun 10 Joer konnt de Fonds d’avenir e Kapital vu méi wéi 3,6 Milliounen Euro opbauen. D’Zënse vun de Placementer hunn 2024 133.811 Euro erabruecht.
Am Mäerz 2025 konnt d’Fondatioun Sainte-Irmine dës 133.811 Euro un de Bistum weiderleeden, fir esou zur Finanzéierung vun de Paie vu jonke Geeschtlechen a Laien am kierchlechen Déngscht bäizedroen.
Mir si frou an houfreg ze gesinn, datt de Fonds d’avenir éischt Friichte bréngt!
2024 huet d’Fondatioun weider Reklamm fir de Fonds d’avenir gemaach, dëst besonnesch wärend der Oktav.
6. D’Verwaltung vun der Fondatioun
Wärend dem Exercice 2024 huet sech de Verwaltungsrot ënnert dem Virsëtz vun eisem Här Äerzbëschof dräi Mol zesummefonnt fir d’Gestioun vun der Stëftung. D’Joer 2024 war besonnesch gepräägt vun den Aarbechten ronderëm d’Statutenännerungen an der Suite vum neie Gesetz iwwer d’Associatiounen an d’Fondatiounen a vun der Entwécklung vun enger Investitiounspolitik vun de Placementer.
D’Ekipp vun der Fondatioun trëfft sech all Woch, fir déi alldeeglech Verwaltung vun der Stëftung a fir d’Ausschaffe vun Outilen, fir Reklamm ze maache fir d’Projeten. Iwwer eisen Internetsite bleiwe mir no bei den Donateuren, a mir hunn en oppent Ouer fir hir Wënsch.
7. Donen, déi 2024 erakomm sinn an an d’Projeten investéiert goufen
Wärend dem Joer 2024 huet d’Fondatioun Donen an Testamenter am Gesamtwäert vun 1.464,882.- Euro krut; eng Zomm, déi däitlech méi héich ass wéi d’Joer 2023. Déi Projeten, déi am meeschte vun den Donatricen an Donateuren ënnerstëtzt goufen, si wéi dat Joer virdrun de Fonds d’avenir, de Kierchefong (d’Poren an d’Kierchefabricken) an d’Tëleesmass. Op ee Bléck gesidd Dir an deenen zwee Grafiken heidrënner d’Zomm, déi pro Projet erakomm ass, an de Gesamtmontant pro Kategorie vu Projeten. Déi 2 Grafiken heidrënner ginn op ee Bléck eng Iwwersiicht, wivill pro Projet erakomm ass an op wivill de Gesamtbetrag pro Projetskategorie sech beleeft.
De Verwaltungsrot an d’Ekipp vun der Fondatioun soen allen Donatricen an Donateuren villmools Merci fir hir Generositéit an hir Trei.
De finanzielle Bilan vum Exercice 2024 vun der Fondatioun Sainte-Irmine an d’auditéiert Konte sinn am Juni 2025 disponibel.
Dir hutt eng Fro oder eng Ufro? Mir si fir Iech do: info@irmine.lu, Tel. 462023.